Exam.net er så mykje meir enn berre prøver

Som lærar brukar eg Exam.net like mykje til diagnostiske og formative lekser som til prøver med karakter. Her er nokre tankar og idear om du ikkje har prøvd dette før …

Førebuande lekser til neste time

Om du likar «omvendt undervisning» (flipped classroom) like godt som eg – der elevane førebur seg før timen – kan Exam.net vere svært nyttig. Eg gir vanlegvis elevane eit diagnostisk arbeidsark med spørsmål før vi byrjar på eit nytt tema, slik at eg får eit inntrykk av kva dei kan før vi startar. Erfaringa mi er at elevane veit at dette ikkje gir karakter – det skal hjelpe meg å leggje opp dei neste timane meir effektivt – og dei svarar ærleg.

Med automatisk retta spørsmål får eg endå raskare og meir direkte tilbakemelding – eg får med ein gong oversikt over det generelle kunnskapsnivået i klassen og over kor godt kvar enkelt elev kan temaet. Eg tek berre ein rask kikk i Oversikt/Resultat etter at dei har levert.

Det ser ut til at eg må byrje frå grunnen av … 😐
I resultatvisninga kan eg til og med sjå kven som gjorde arbeidet i siste liten, og kven som ikkje gjorde det i det heile!

Elevane kan også få tilbakemelding med ein gong og sjå dei rette svara etter at dei har levert. Berre gjer ei rask justering i innstillingane.

Lekser med formativ tilbakemelding

Med tida har eg bygd opp ein bank med arbeidsark som eg brukar på nytt i ulike klassar, og sidan dei ligg i prøvelista, kan eg lett finjustere dei etter at eg har prøvd dei ut. Når eg lagar arbeidsark som for det meste eller heilt blir retta automatisk, sparer eg mykje tid på retting, og elevane får formativ tilbakemelding oftare.

Sjølv om resultata til elevane ikkje nødvendigvis kan brukast til karaktersetjing, merkar eg at elevane sjølve set pris på å få formativ tilbakemelding oftare. Det gjeld særleg elevar som slit med å motivere seg sjølve og ofte treng jamlege sjekkar av framdrifta for å halde seg på rett spor.

No som eg har halde på med dette ei stund, tek det berre eit par minutt å gi eit eksisterande arbeidsark til ei ny gruppe. Ein rask kikk i resultatvisninga gir meg oversikt over framdrifta i klassen og viser kva elevar som slit, eller som ikkje gjer leksene i det heile.

Set ein frist for lekser

Om eg vil gi elevane eit par dagar på å gjere ei lekse og levere ho seinast ved skuleslutt på torsdag, til dømes, gir eg dei berre fristen og stengjer prøva i prøvelista på det tidspunktet, slik at ingen fleire kan leggje inn svar.

Brukar du Google Classroom, kan elevane finne oppgåva der, og om du ikkje gjer det, kan du enkelt sende kvar elev ein individuell nøkkel på e-post, slik at dei kan halde fram med arbeidet heime.

Hjelp elevane å halde fokus på leksene

Sidan elevane er låste inne i prøvemiljøet og det fyller heile skjermen, blir dei ikkje distraherte av varsel frå sosiale medium, meldingsappar eller nettsider. Mange elevar fortel meg at dette er svært nyttig og hjelper dei å halde fokus lenger, og vi veit alle at talet på elevar med konsentrasjonsvanskar ikkje går ned!

Ikkje forstyrr!

Sidan eg ikkje vil handtere elevar som blir stengde ute frå oppgåva medan eg slappar av (eller meir sannsynleg rettar 😴) om kvelden, vel eg ein låg sikkerheitsmodus i innstillingane.

Her er to ulike alternativ som eg tilrår i ulike situasjonar. Eg brukar den lågaste sikkerheitsinnstillinga (Tillat kva som helst nettlesar), som likevel sikrar at elevane ikkje blir distraherte av varsel på datamaskina.

Eg vel vanlegvis å slå av hindringa av fusk heilt om oppgåva ikkje gir karakter. Til dømes eit arbeidsark der eg vil oppmuntre dei til å slå opp ting.

Denne innstillinga ville eg valt om elevane til dømes skulle lese ein tekst og svare på spørsmål, eller skrive sine eigne tekstar.

Ekstra fordelar:
Elevane kan ikkje gå på internett for å kopiere og lime inn KI-genererte tekstar eller tekstar frå andre kjelder i prøvevindauget utan at eg får beskjed.

PS! Ikkje gløym å gi elevane prøvenøkkelen før ei lekse (jepp, har vore der … 🙄), og sjølvsagt – hugs å opne prøva 😆

Nyt tida du sparer når du prøver ut dette!

Nic Cardwell
Matematikklærar